قرار خطير .. إيه اللي حصل ؟

 
 
هو ايه اللي هيحصل نهاردة من تاني في قصة زيادة أسعار العيش المدعم وايه منتظر الحكومة تعلنه للناس وايه مصير الرغيف نفسه وقيمة الدعم اللي على بطاقات التموين وحصة كل بطاقة.. تعالوا نشوف التفاصيل وايه اللي هيحصل النهاردة.
 
زي ما كلنا تابعنا امبارح قرارات الحكومة برفع أسعار الخبز المدعم من 5 إلى 20 قرش في أول تحريك الأسعار من سنين طويلة ومن ساعة الحكومة ما خدت القرار الناس محتارة ومش عارفين هيتصرفوا ازاي من اول الشهر ولا حصتهم من العيش على بطاقات التموين هتبقي كام ولا حجم ووزن الرغيف هيبقي قد ايه وهل هيكون فيه تغيير في منظومة صرف العيش المدعم ولا الدنيا هتمشي ازاي والحقيقة دي اسئلة طبيعية وخاصة إن أصحاب الأفران نفسهم ماةيعرفوش تفاصيل تطبيق قرارات الحكومة الجديدة.

وعشان الحكومة تحط النقط على الحروف وتحسم كل التفاصيل الخاصة بمنظومة صرف العيش المدعم وحصص المواطن ووزن الرغيف قررت تعمل اجتماع موسع النهاردة الخميس مع مسؤولي شعبة المخابز في مصر، ودا اللي قاله عبدالله غراب رئيس الشعبة وان فيه اجتماع عاجل مع وزير التموين النهاردة ، لبحث آليات تطبيق قرار الحكومة الأخير بشأن رغيف الخبز مع مراقبة المخابز.
وقال  رئيس الشعبة كمان إن  الدولة هي اللي بتحدد وزن وسعر رغيف العيش المدعم وإن الشعبة ملهاش علاقة بالوزن لأن دور شعبة المخابز يتلخص في الإنتاج بس وقال إن اسعار الخبز المدعم لسه مستقرة عند 5 قروش للرغيف حتى نهاية الشهر  وقال كمان حاجة مهمة جدا وهي ان 65% من وجبة المواطن عبارة عن خبز، وإن وزن رغيف كان 130 جراماً وتراجع إلى 120 جراماً ثم استقر عند 90 جراماً حاليا ده بخلاف مشكلات ارتفاع تكاليف الإنتاج والعمالة في منظومة الخبز خلال الفترة اللي فاتت وضرب مثل أن تكلفة إنتاج جوال الدقيق الواحد تخطت الـ500 جنيه. 
وأكد غراب على استقرار سعر الخبز الحر أو “السياحي” الفترة الجاية  وان سعر الخبز وزن 80 جراماً حاليا ب 1.5 جنيه، ومن يتلاعب في جرام واحد يعرض نفسه للحبس حسب كلامه لكن الأمر ما يسلمش من التلاعب والطمع واستغلال بعض أصحاب المخابز للقرارات الجديدة واللي لازم الحكومة تحسمها.

يعني النهاردة يوم حاسم في حياة المصريين وهيتم الكشف عن كل التفاصيل الخاصة بصرف الخبر المدعم بخصوص الحصص المقررة ووزن الرغيف وازاي الأمور هتمشي في الأفران والمخابز وايه اللي هتقدمه الحكومة عشان الناس ماتحسش باي فرق وازاي هتراضي أصحاب المخابز بعد اللي قاله غراب حولين ارتفاع التكلفة والعمالة والوقود ولأن رغيف العيش هو أهم حاجة عند المصريين فأكيد النهاردة هيكون يوم صعب وخطير وحاسم وهنشوف الحكومة هتعمل ايه.