علق عريس كفر الدوار الذي تصدر التريند في الفترة الأخيرة بعد نشر فيديو له أثناء ذهابه للكوافير لأخذ عروسته للاحتفال بخطبتهم، على الأزمة التي تعرض لها
وقال محمد خلال حواره مع الفنانة والإعلامية لقاء سويدان في أول ظهور تلفزيوني لها، من خلال برنامج “لقاء على الهواء” المذاع عبر قناة الشمس:” أنا اتبهدلت، وحياتي اتبهدلت، أنا أول مرة أدخل كوافير ومعرفش يعني إيه تريند أصلا”.
وأضاف عريس كفر الدوار:” أنا والعروسة قصة حب وكانت بتفضل تبص عليا من الشباك، إزاي الناس تقول إنها مغصوبة عليا..أنا تعبان نفسيا جدا من وقت الشبكة، أنا ولا بقيت بشتغل ولا حتى قادر أبص في عين أبويا والبلد مقلوبة علينا وادمرت نفسيا، الناس بتتمر عليا عشان كنت ببوس أيد خطيبتي وبحاول أراضيها”.
وتابع عريس كفر الدوار: “هعمل إيه الفلوس اللي معايا خلصت ومكنش معايا فلوس اجيب بدلة وبوكية ورد، أنا اشتريت قميص بـ 175 جنيه ودفعتلها 1500 جنيه للكوافير والفستان ومكنش في مقدرتي أعمل أكتر من كده”.
واختتم: “أنا مش هسيب حقي من عم صبري صاحب الكوافير، أنا مقولتش له صور، أنا هاخد حقي بالقانون”.
ومن جانبها قالت خطيبة محمد عريس كفر الدوار في مداخلة هاتفية خلال البرنامج: “أنا بحبه وكل الكلام اللي قاله صح، أنا بس عاوزة أقول للناس سيبونا في حالنا وياريت كل واحد يخليه في حاله”.
وعلقت عروس كفر الدوار، على أزمتها مع خطيبها والتي انتشرت على مواقع التواصل الاجتماعي السوشيال ميديا، مشيرة إلى أن خطيبها لم يخرج من بيته بعد انتشار الفيديوهات.
ووجهت عروس كفر الدوار، خلال حوارها مع الإعلامية نهال طايل ببرنامج «تفاصيل» المذاع على قناة صدى البلد 2، حديثها لخطيبها محمد، قائلة: «حابة أصالح خطيبي وبقوله أنا آسفة على اللي أنا عملته معاك يا محمد أنا خطيبتك وحبيبتك لأن إحنا مش معرفة يوم وبعتذر له قدام الكل».
وتابعت عروس كفر الدوار، أن ما حدث سيكون أول درس في بداية حياتها: «أنا يا محمد بحبك قدام الناس كلها.. الفيديو خلى نفسيتنا زي الزفت ومش عارف يروح يشتغل ولا ينزل شغله».
وأشارت «نسمة» إلى أن الأمور كانت تسير على ما يرام إلى أن قام خطيبها بمخالفة الاتفاق، عندما حضر حفل خطوبتهما دون بدلة ولا إحضار بوكيه ورد، «اختلفنا على كده وزعلت لما شوفته انه مسمعش الكلام وكان سوء تفاهم بسيط، لكن معرفش صاحب الكوافير عمل ليه كده».
محدش استأذنا
وعن نشر الفيديو قالت نسمة إنها لم تعلم شيئا عنه: «محدش استأذنا وكذا حد ورهولنا كده، صاحب الكوافير صور وقال لنا هبعته لكم على الواتس الخاص بيكم، أنا كنت رافضة في البداية وقولت له مش بحب اتصور خلى خطيبي دخل وصورني قدام الأمر الواقع.. قالي تعالي يا عروسة وصورني.. حسبي الله ونعم الوكيل فيهم».
وأكدت عروس كفر الدوار، أنها فوجئت بالفيديو المنتشر على السوشيال ميديا، متسائلة عما حدث وما يقوله البعض عن تفاصيل ما حدث: «منقيين صور وحشة وأنا وخطيبي نفسيتنا زي الزفت.. أنا وهو بنحب بعض، مافيش حاجة وحشه بينا».
